Kreditorlik qarzlarining aylanuvchanligi kompaniyaning o‘z yetkazib beruvchilariga qanchalik tez to‘lov qilishini ko‘rsatadigan ko‘rsatkich. Sodda qilib aytganda, bu tovar qabul qilinganidan to uning uchun to‘lov qilingungacha o‘tgan vaqt.
Agar kompaniya tez to‘lasa, demak, moliyaviy ahvolida muammo yo‘q. Lekin, juda tez to‘lash har doim ham foydali emas: pul biznesda ishlashi mumkin edi. To‘lovlar kechiktirilsa, hamkorlar ishonchni yo‘qotadi va ular bilan ishlash qiyinlashadi.
Qanday hisoblanadi
Ko‘rsatkichni hisoblash uchun sotilgan tovarlar tannarxini olib, mol yetkazib beruvchilar oldidagi o‘rtacha qarzga bo‘lish kerak. Bu aylanish koeffitsiyenti bo‘ladi.
Keyin 365 ni shu koeffitsiyentga bo‘lsangiz, kompaniya o‘z qarzlarini to‘laydigan kunlarning o‘rtacha sonini olasiz.
Masalan, agar natija 45 kun bo‘lsa, demak, o‘rtacha bir yarim oyda bir marta yetkazib beruvchilar bilan hisob-kitob qilinadi. Raqam qanchalik kichik bo‘lsa, kompaniya qarzlarini shunchalik tez to‘laydi.
Natijani qanday tushunish mumkin
Har bir sohaning o‘z muddati bo‘ladi. Agar kompaniya 15–20 kundan keyin to‘lasa, bu yaxshi intizomdan dalolat beradi, lekin pul juda tez sarflanadi. 30–60 kunlik davr eng mukammal muddat hisoblanadi: hamkorlar ham mamnun qoladi, biznesda ham bo‘sh pul bo‘ladi. Muddat 90 kundan oshib ketsa, o‘ylab ko‘rish kerak: balki likvidlik yetishmayotgandir yoki to‘lovlarni boshqarish bilan bog‘liq muammolar bordir.
