Toshkentda tug‘ruq qancha turadi: tug‘ruq uylari sharhi va onalarning fikrlari
Bundan to‘rt yil oldin qizimni kutayotganimda Toshkentda tug‘ruq narxlari nimalardan tashkil topishi va uni qayerdan izlash kerakligini o‘ylab boshim qotgandi. Hozir yana shunday vaziyat — ikkinchisini rejalashtiryapmiz. O‘shandan beri vaziyat unchalik o‘zgargani yo‘q: shaharda aniq narx-navoning o‘zi hamon yo‘q. Topgan raqamlarim, tug‘ruq uylari bir-biridan nimasi bilan farq qilishi haqida gapirib beraman va boshqa onalarning fikrlari bilan o‘rtoqlashaman.
Tug‘ruq narxiga nimalar kiradi?
2022-yilda tug‘ruq uyi kassasiga 2,6 million so‘m to‘laganman, 500 mingni xodimlarga tarqatib chiqqanman va shifokorga yana 200 dollar sovg‘a qilganman. "Tug‘ruq" degan yaxlit paketning o‘zi yo‘q — siz narxnomadagi alohida bandlar uchun to‘laysiz va boshqa mayda-chuyda xarajatlar uchun naqd pul tayyorlab qo‘yasiz. Quyida ota-onalarning asosiy xarajatlarini keltirib o‘taman.
Tug‘ruq uyi xizmatlari. Tug‘ruqdan keyin quyidagilar uchun pul to‘lashingizga to‘g‘ri keladi:
Tabiiy tug‘ruq yoki kesarcha kesish;
Epidural anesteziya;
Dori-darmonlar va sarf materiallari;
Muolajalar;
Tahlillar;
Ko‘rik va maslahatlar;
Emlashlar;
Palata — oddiy, ikki kishilik, yarim lyuks yoki lyuks;
Ovqatlanish.
Shifokorga sovg‘a. Ko‘p ota-onalar shifokor bilan oldindan kelishib olishadi. Shunda u o‘z navbati bo‘lmasa ham to‘lg‘oq boshlanganda yetib kelib, tug‘ruqni qabul qiladi. O‘zingizning akusher-ginekologingiz ahvolingiz, nima xohlayotganingiz, o‘ziga xos xususiyatlaringizdan xabardor bo‘ladi. Palata tanlash kabi mayda-chuyda ishlarda ham yordam beradi. Shifokorga minnatdorchilik bildirasizmi yo‘qmi, o‘zingiz hal qilasiz — bu ixtiyoriy.
Suyunchi. Mo‘tabarning aytishicha, tug‘ruqdan keyin darhol eri bilan birgalikda klinikaning bir juft xodimiga 200 mingdan, akusherlarga 100 dollar, xodimlarga yana 1 million so‘m tarqatishgan. «Tejash uchun, hatto chiqish kunimda soat 6 larda, hamma tarqab ketganda narsalarimni olib, erimning oldiga o‘zim sekin chiqdim», — deb eslaydi Mo‘tabar.
Sizga ham suyunchi puli tegadi: birinchi farzand tug‘ilganda beriladigan nafaqa. Metrikasi chiqqandan keyin pul ota-onaning kartasiga tushadi — 2026-yilda qariyb 900 ming so‘m chiqadi.
Chiqish xarajatlari. Ota-onaning xohishiga ko‘ra tug‘ruq uyidagi go‘zallik saloni, ona uchun gul dastasini, mashinalar ijarasi, odam bo‘yi keladigan qo‘g‘irchoqlar buyurtma qilish, sharlar va syomka uchun pul to‘lanadi.
Tug‘ruq uyini qanday tanlash kerak?
Kimdir klinikaning obro‘siga, palatalardagi sharoitlarga, narxlar va joylashuviga qaraydi. Boshqalar esa aniq bir akusher-ginekologga borishadi — uning qayerda ishlashi esa muhim emas. Ko‘pincha shifokorlar va tug‘ruq uyini tajribasi bor tanishlarning maslahati bilan tanlashadi.
3 ta asosiy variantni ko‘rib chiqamiz: tuman tug‘ruq uyi, perinatal markaz va xususiy klinika.
Tuman tug‘ruq uyi
Bu yerda navbatchi shifokor to‘lg‘oq bilan kelgan istalgan ayolning tug‘rug‘ini hech qanday pullik xizmatlarsiz qabul qilishga majbur. Agar shu tumanda doimiy yashasangiz, palata, ovqatlanish va dorilar ham tekin bo‘ladi.
6-, 8- va 4-sonli tug‘ruq majmualari el og‘zida. Ko‘p onalar ularni hamma uchun ochiqligi va obro‘li shifokorlari uchun tanlashadi. Guruhlarda akusher-ginekologlar Traykovich, Uro-Nil, Son San Sanich va boshqalar haqida ijobiy fikrlar tez-tez uchrab turadi. Ularning navbatiga tez yordam orqali tasodifan tushish mumkin yoki shifokor bilan oldindan gaplashib qo‘ysa ham bo‘ladi.
Bunday tug‘ruq uylarining kamchiligi — palatalardagi sharoitlar. Oddiy xonalarda ko‘pincha dush-hojatxona yo‘q, dush va tualet butun qavat uchun bitta umumiy bo‘ladi. Qo‘shimcha pul to‘lab yarim lyuks yoki lyuks xonaga o‘tishga harakat qilsa bo‘ladi, lekin ular doim ham bo‘sh turmaydi. «Qizimni uch yil oldin 8-sonli tug‘ruq uyida propiskam bo‘yicha tug‘gandim. Hech kim bilan kelishmaganman — to‘lg‘oq kuni shunchaki o‘zim borganman. O‘shanda lyuks uchun qo‘shimcha pul to‘lagandim, lekin u ham hojatxona va vannasiz chiqdi, qavatdagiga qatnovdim», — deydi Madina.
Perinatal markaz
Bu markazlarda zo‘r jihozlar, maxsus bo‘limlar, masalan, yangi tug‘ilgan chaqaloqlar patologiyasi bo‘limi bor, shifokorlar esa fan doktorlari. Eng mashhurlari — SAMPI va akusherlik va ginekologiya ilmiy-amaliy tibbiyot markazi. Bu yerda homiladorligi og‘ir kechgan ayollar yotqiziladigan orderingiz bo‘lsa, tekin tug‘ishingiz mumkin. Qolganlar esa rasmiy pullik xizmatlardan foydalanishadi.
«2024-yilda vaqtidan oldin tug‘ruq bo‘lgan menda. Tuman poliklinikasida hisobda turardim, tahlillar va UZIni xususiylarda qildirgandim, tug‘ruqqa bir oy qolganda menga SAMPIda order berishdi. O‘sha bilan tug‘ruqning o‘zi ham, qolgan hamma narsa — umumiy palata, ovqat, dorilar, muolajalar ham tekin bo‘ldi. Lyuksda ikki kun yotganim uchun 700 ming so‘m qo‘shimcha to‘ladim, o‘z shifokorim va uning jamoasiga esa chiqish kunida o‘z nomimdan 500 dollar sovg‘a qildim», — deb hikoya qiladi Katerina.
Xususiy klinika
Ilgari Toshkentda davlat muassasalaridan boshqa joyda tug‘ish degan narsa yo‘q edi. 2025-yilda ikkita yangi xususiy tug‘ruq uyi ochildi. Bular SINOMED MD va Rano Fayz Med dagi tug‘ruq bo‘limlari. Bu yerda bo‘lajak onalarga zo‘r sharoitdagi paketlarni taklif qilishadi, palatalari esa huddi mehmonxonaga o‘xshaydi. Yagona kamchiligi — narxi ancha qimmatligi.
Toshkentdagi tug‘ruq narxlari
Tug‘ruq uylari haqida ma'lumot topish qiyin: saytlari ishlamaydi, instagramda narxlar yozilmagan, palatalarning rasmlari ham kam. Akusherlik va ginekologiya ilmiy-amaliy tibbiyot markazi saytida 2025-yilgi narxnoma turibdi. Lekin SAMPI saytidagi jadval onalar aytayotgan real pulga umuman to‘g‘ri kelmaydi. Registraturaga telefon qilsangiz ham pul haqidagi savollarga aniq javob berishmaydi. Shahardagilarning narxlari har xil — tuman tug‘ruq uyidagi tekin tug‘ruqdan tortib qimmat xususiy klinikaning pullik shartnomasigacha boradi.
2026-yil boshida so‘mdagi taxminiy tug‘ruq narxlari
Tug‘ruq uyi
Tabiiy tug‘ruq narxi
Operativ tug‘ruq narxi
Narxga nimalar kiradi
Mirzo Ulug‘bek tumani 6-sonli tug‘ruq uyi
Shoshilinch bo‘lsa tekin
Shoshilinch bo‘lsa tekin
Faqat shoshilinch tug‘ruq
Mirzo Ulug‘bek tumanida propiskasi borlarga palata, ovqat, dorilar va muolajalar
Propiskasizlar uchun palatada 1 kun, keyingi kunlari palata kuniga 470 000 dan boshlanadi; ovqat, dorilar va muolajalar alohida to‘lanadi
Respublika ixtisoslashtirilgan akusherlik va ginekologiya ilmiy-amaliy tibbiyot markazi
2 944 000 dan boshlab
3 172 000 dan boshlab
Faqat tug‘ruq
Palata kuniga 400 000 dan boshlab
Ovqat, dorilar va muolajalar alohida to‘lanadi
Respublika perinatal markazi (SAMPI)
5 000 000 dan boshlab
5 000 000 dan boshlab
Faqat tug‘ruq
Palata, ovqat, dorilar va muolajalar alohida to‘lanadi
2024-yilda akusherlik va ginekologiya markazida tuqqan uchta qizning gaplarini eshitib, hamma narsa har xil chiqishiga yana bir bor amin bo‘ldim. Ulardan biri tug‘ruq, tahlillar, ko‘rik va muolajalar unga 3,7 million so‘mga tushganini aytadi. Alohida palatada ikki kun yotish — 950 ming, ovqatga 100 ming va bola uchun statsionar hamda tekshiruvlarga 726 ming so‘m ketgan.
Mamalife.uz guruhidagi kesarcha kesish yo‘li bilan tug‘gan qiz dori-darmon, operatsiya, narko‘z, bolani qarash va yarim lyuks uchun 12 million so‘m berganini eslaydi. Homiladorlik boshidan beri uni kuzatib kelgan shifokorga eri 500 dollar sovg‘a qilgan. Uchinchi qiz — Sayora undan ham ko‘proq sarflagan: ikkita epidural uchun 15 million so‘m, lyuks tug‘ruq zalida bir sutka, yarim lyuksda ikki kun va tahlillar.
Yana bir ona 2023-yilda SAMPIdagi tug‘ruqlarini eslaydi. Kassaga u 5 million so‘m to‘lagan. Alohida palatada to‘rt kun yotgani 1,4 millionga tushgan. Pediatr, anesteziolog va yordamchilarga suyunchi bergan, oxirida eri shifokorga 500 dollar sovg‘a qilgan. Hammasi bo‘lib 1 200$ atrofida pul ketgan.
Yaqinda farzandli bo‘lgan boshqa ota-onalarning fikrlarini mana bu yerda o‘qishingiz mumkin:
Eng ishonchli va 100% ish beradigan yo‘l — klinikalarga o‘zingiz borib, shifokorlar bilan yuzma-yuz gaplashish. Sabr qilishga to‘g‘ri keladi: tug‘ruqxonalar 24/7 ishlaydigan davlat muassasalari, shuning uchun shifokorlar deyarli doim band bo‘lishadi. Shunda doktorlar bilan tanishib, sharoit va joylashuvini o‘zingiz ko‘rasiz va jajji farzandingiz qayerda dunyoga kelishi haqida o‘ylab, to‘g‘ri qaror qabul qila olasiz.
*Maqolada keltirilgan ma’lumotlar saytga joylashtirilgan vaqt uchungina amal qiladi: fikrlar muallifning shaxsiy qarashlarini aks ettiradi va AVO bank'ning rasmiy nuqtayi nazariga mos kelmasligi mumkin. Bank havola qilingan tashqi manbalar uchun mas’uliyatni zimmasiga olmaydi, ko‘rsatilgan narxlar esa taxminiy xarakterga ega. Qaror qabul qilishdan oldin eng so‘nggi ma’lumotlar bilan tanishib chiqishni tavsiya qilamiz.
Bu AVO onlayn bankining rasmiy sayti. «AVO bank» xizmatlarni shaxsiylashtirish va ulardan foydalanish sifatini yaxshilash uchun cookie fayllardan foydalanadi. Cookie fayllari veb-saytga oldingi tashriflar haqidagi ma’lumotlarni o’z ichiga olgan kichik fayllardir. Agar siz cookie fayllardan foydalanishni istamasangiz, iltimos, brauzer sozlamalarini o’zgartiring.
