Ramazon oyi butun dunyo musulmonlari uchun ruhiy poklanish, samimiy niyatlar va ro‘za tutish bilan to‘lgan muqaddas oydir. Biroq kun bo‘yi davom etgan ro‘zadan so‘ng dasturxondagi taomlarning mo‘lligi, haddan tashqari ovqatlanish va nomutanosib kundalik tartib salomatlikka salbiy ta’sir etishi mumkin. Keng tarqalgan xatolardan saqlanish va sog‘ligingizni saqlash, hattoki uni mustahkamlash uchun quyidagi foydali maslahatlardan foydalaning.
Saharlikda uxlab qolmang
Shuni yodda tutish kerakki, saharlik — kundalik ro‘zadan oldingi so‘nggi ovqatlanishdir. Saharlik qanchalik foydali va to‘yimli bo‘lsa, iftorgacha shuncha kuch-quvvat yetadi. Eng yaxshisi, sekin hazm bo‘ladigan mahsulotlarni tanlash: suli bo‘tqasi, butun donli non, yong‘oq, xurmo, banan kabilar. Oqsillar haqida ham unutmaslik lozim: tvorog, pishloq, tuxum shular jumlasidandir.
Agar erta turib bo‘tqa tayyorlash qiyin bo‘lsa, «dangasa suli bo‘tqasi»ni tayyorlash mumkin. Uyquga yotishdan oldin kichik idishga suli soling, ustiga yunon yogurti yoki sut quying (hatto bodom suti ham to‘g'ri keladi), o'zingizga yoqqan topping (banan, reza mevalar, yong‘oq va hokazo) seping, so‘ng muzlatgichda qoldiring — mana, sizning «dangasa suli bo‘tqangiz» saharlikka tayyor bo‘ladi.
Ovqatlanishni xurmodan boshlang
Xurmo magniy, kaliy va uglevodlarga boy meva hisoblanadi. U kun bo‘yi energiya bilan ta’minlaydi, shuningdek, ovqat hazm qilish tizimining ishlashini tartibga soladi.
Ramazon oyida xurmo iftorlikni boshlash uchun an’anaviy meva sanaladi. Bir kilo xurmo narxi 47 000 so‘mdan 280 000 so‘mgacha boradi — bu xurmo navi, o‘lchami va import qilingan mamlakatiga bog‘liq.
