Siz toʻyga taklifnoma oldingiz va konvertga qancha pul solish haqida bosh qotiryapsiz. Qanday qilib hamyonni qiyin ahvolga solmaslik, shu bilan birga mezbonlar oldida noqulay vaziyatga tushib qolmaslik mumkin? Toshkentliklar bilan ularning toʻylarida qancha pul sovg‘a qilishgani va oʻzlari mehmonga borganda qancha xarajat qilishga tayyor ekanliklari haqida gaplashdik — quyida oʻrtacha raqamlar va odamlarning fikrlari bilan oʻrtoqlashamiz.
Nega aynan pul sovgʻa qilgan yaxshi?
Hozirgi kunda toʻyga naqd pul berish uyat hisoblanmaydi. Aksincha, pul eng universal sovgʻaga aylanib boʻldi. Bu mehmon uchun ham juda qulay: doʻkonma-doʻkon yurib, sovgʻa qidirib bosh ogʻritgandan koʻra, bitta chiroyli konvert sotib olish kifoya. Qolaversa, boʻlajak er-xotinlarning oʻzlari ham koʻpincha shu variantni maʼqul koʻrishmoqda.
Kimdir toʻy xarajatlarini yopishi kerak — dabdabali marosimlar har qanday oilaning choʻntagiga jiddiy zarba berishi sir emas. Toʻy xarajatlarini toʻliq qoplab boʻlmasligi aniq, biroq koʻp yoshlar byudjetni rejalashtirishda aynan mana shu pullarga umid qilishadi. Boshqalar uchun esa yangi uyni jihozlash birinchi oʻrinda turadi. Yoshlar toʻydan keyin alohida yashashni boshlaydi, kimdir ota-onasi bilan qolib, uyni yangidan ta’mirlaydi, yana kimdir ijara yoki yangi kvartiraga koʻchib oʻtadi. Bunday vaziyatda sovgʻa qilingan pullar maishiy texnika, mebel yoki uy xarajatlariga sarflanadi.
Agar uy-joy masalasi hal boʻlgan boʻlsa, er-xotin asal oyiga yoʻl olishlari mumkin. Toʻy faqat eng yaqinlar davrasida ixchamgina oʻtgan boʻlsa ham, yigʻilgan pullar Turkiya, Tailand yoki hatto Maldiv orollariga borib kelishga bemalol yetadi.
